Jóhann Berg enn úr leik

Jóhann Berg Guðmundsson verður ekki í leikmannahópi Burnley fyrir leik liðsins gegn Gylfa Þór Sigurðssyni og félögum í Swansea um helgina.

Jóhann Berg er að glíma við vöðvameiðsli í læri sem hann varð fyrir í bikarleik Burnley gegn Lincoln í síðasta mánuði. Hann hefur þó ekki spilað deildarleik síðan 2. janúar er Burnley tapaði fyrir Manchester City, 2-1.

Óvíst er hvort Jóhann Berg verður klár í slaginn þegar Ísland mætir Kósóvó í undankeppni HM 2018 þann 24. mars.

Leikur Burnley og Swansea fer fram á laugardaginn kl 15.00 og verður Gylfi Þór Sigurðsson á sínum stað í leikmannahópi síðarnefnda liðsins, sem er nú tveimur stigum frá fallsæti. Burnley er í ellefta sæti deildarinnar, sjö stigum á undan Swansea.