Arsenal hefur oft tapað mjög illa undir stjórn Wengers en hvert er versta tapið?

Arsene Wenger, knattspyrnustjóri Arsenal, á fyrirsagnir dagsins og bara af röngum ástæðum. Skytturnar létu Bayern München valta yfir sig öðru sinni, 5-1, í seinni leik liðanna í 16 liða úrslitum Meistaradeildarinnar og töpuðu samanlagt, 10-2.

Til að bæta gráu ofan á svart datt Wenger í hug að segja eftir leik: „Mér fannst við gera vel en vorum afar óheppnir með sumar ákvarðanir dómarans. Það er erfitt að skilja þetta.“

Frakkinn hefur á 21 árs löngum ferli sem knattspyrnustjóri Arsenal tapað mörgum sinnum ansi illa. Ekki hafa töpin alltaf verið stór en samt ansi slæm eins og í úrslitaleik deildabikarsins á móti Birmingham árið 2011. Birmingham féll úr deildinni sama ár.

Sky Sports er búið að setja upp kosningu um hvert er versta tap Wengers á ferlinum og þar trónir á toppnum hið víðfræga 8-1 tap Frakkans á móti Manchester United árið 2011.

Annað risatap, 6-0 á móti Chelsea, frá árinu 2014 er í öðru sæti sem stendur og Bayern-tapið í gær er í þriðja sæti en kosningin er rétt svo farin af stað.

Hér má sjá öll töpin sem koma til greina og taka þátt.