Conte að ganga frá nýjum samningi

Það er mikill áhugi á knattspyrnustjóra Chelsea, Antonio Conte, og félagið hefur því ákveðið að gera við hann nýjan samning.

Ítalinn hefur náð frábærum árangri með Chelsea á sínu fyrsta ári með félaginu en Chelsea er með tíu stiga forskot í ensku úrvalsdeildinni.

Conte hefur þó ekki alveg verið hamingjusamur því fjölskylda hans er enn á Ítalíu. Hann sagði þó á dögunum að til stæði að fjölskyldan yrði flutt til London fyrir næsta tímabil.

Til að gleðja stjórann enn meira vill Chelsea hækka við hann launin. Vitað er að Inter, sem nú syndir í seðlum, er til í að greiða gull og græna skóga fyrir þjálfarann.

Sjálfur segist Conte vera hamingjusamur hjá Chelsea og ekkert fararsnið á honum þrátt fyrir gylliboð annars staðar frá.

Samkvæmt heimildum Sky Sports gæti verið skrifað undir nýjan samninginn á næstu dögum. Hann skrifaði upprunalega undir þriggja ára samning.