Endurkomusigur hjá Aroni sem lagði upp mark með löngu innkasti

Aron Einar Gunnarsson, landsliðsfyrirliði í fótbolta, og félagar hans í Cardiff unnu flottan endurkomusigur gegn Derby á útivelli í ensku B-deildinni í kvöld, 4-3.

Aron Einar var eins og alltaf í byrjunarliði Cardiff sem lenti 2-0 undir eftir 17 mínútur en velska liðið var komið 3-2 yfir á 57. mínútu. Aron Einar lagði upp 2-2 markið með löngu innkasti.

Darren Bent jafnaði þá metin á 74. mínútu og gerði sig líklegan til að tryggja Derby eitt stig en Joe Ralls tryggði Cardiff sigurinn, 4-3, með marki úr vítaspyrnu á 90. mínútu.

Cardiff er búið að vinna tvo leiki í röð og þrjá af síðustu fjórum en það lyfti sér upp í tólfta sæti deildarinnar með sigrinum í kvöld.

Ragnar Sigurðsson var óvænt kominn aftur í byrjunarlið Fulham sem vann mikilvægan 3-2 sigur gegn Nottingham Forest á útivelli, 3-2. Sigurmarkið var sjálfsmark gestanna á 72. mínútu.

Ragnar var ekki búinn að koma við sögu hjá Fulham síðan 2. janúar en í síðustu sex leikjum var hann fjórum sinnum ónotaður varamaður og tvisvar sinnum ekki í leikmannahópnum. Miðvörðurinn öflugi var aftur á móti tekinn af velli á 28. mínútu.

Hörður Björgvin Magnússon var ekki í leikmannahópi Bristol City fjórða leikinn í röð en liðið tapaði 2-1 fyrir Leeds. Jón Daði Böðvarsson var í byrjunarliði Úlfanna sem töpuðu 1-0 á heimavelli gegn Wigan.

Úlfarnir eru í 18. sæti með 35 stig en Bristol gengur ekkert þessa dagana. Liðið er í 20. sæti með 32 stig og er aðeins búið að vinna einn af síðustu sex leikjum sínum.

Birkir Bjarnason var svo kominn á bekkinn hjá Aston Villa eftir að byrja þrjá fyrstu leikina eftir komu sína til félagsins. Hann kom inn á sem varamaður á 73. mínútu fyrir Alan Hutton í 3-1 tapi Villa gegn Barnsley.

Aston Villa er ekki búið að vinna leik á þessu ári en það er búið að tapa sex af sjö og fá aðeins eitt stig.