Fyrrum fyrirliði Brighton látinn

Paul McCarthy, fyrrum knattspyrnumaður, lést í gær aðeins 45 ára. Dánarorsök hans er ekki kunn en í yfirlýsingu á heimasíðu Brighton Hove & Albion er hann sagður hafa „látist skyndilega“.

McCarthy fæddist á Írlandi en fékk sinn fyrsta atvinnumannsamning hjá Brighton. Hann lék með liðinu frá 1988 til 1996 og var fyrirliði þess síðasta tímabilið sitt hjá liðinu.

Hann gekk svo í raðir Wycombe Wanderers og fór með liðinu alla leið í undanúrslit ensku bikarkeppninnar árið 2001. Hann lék síðar á ferlinum með Oxford United, Hornchurch, Ebbsfleet United og Crowborough Athletic.

Alls lék hann meira en 500 leiki á ferlinum, þar af rúmlega fyrir 200 fyrir Brighton. Hann var á sínum tíma í U-21 liði Írlands.