Lögðu hald á lyf fyrir 29 milljarða

Lögreglu-, tolla- og heilbrigðisyfirvöld í níu Evrópulöndum hafa lagt hald á 75 milljón töflur af lyfseðilsskyldum lyfjum og handtekið 111 manns.

Þetta var gert í umfangsmestu aðgerð sem ráðist hefur verið í í Evrópu vegna ólöglegra viðskipta með læknadóp.

Um var að ræða samstarfsverkefni, stýrt af Europol, milli yfirvalda í Frakklandi, Finnlandi, Rúmeníu, Ungverjalandi, Grikklandi, á Spáni, Ítalíu, Bretlandi og Írlandi. Verðmæti lyfjanna er metið á tæpa 29 milljarða íslenskra króna.

Ráðist var í 205 sjálfstæðar rannsóknir innan verkefnisins, sem gekk undir nafninu MISMED, en 277 manns sættu rannsókn.

Um var að ræða róandi lyf, svefnlyf, ópíóðalyf og lyf við ofvirkni og athyglisbresti.