755 bandarískir erindrekar reknir úr Rússlandi

Vladimir Putin, forseti Rússlands, tilkynnti í dag að 755 bandarískum erindrekum yrði gert að yfirgefa Rússland. Hann sagði mikið þurfa til að bæta samskipti ríkjanna eftir að Bandaríkin hertu nýverið refsiaðgerðir sínar gegn Rússlandi vegna afskipta þeirra af forsetakosningunum í Bandaríkjunum í fyrra og vegna hernaðaraðgerða þeirra í Úkraínu.

Putin sagði rúmlega þúsund manns vinna í sendiráði og ræðismannsskrifstofum Bandaríkjanna í Rússlandi.

„Við höfum beðið nógu lengi, vonandi að ástandið myndi mögulega skána. Hins vegar er útlit fyrir að ef að muni gerast, verði það ekki á næstunni,“ er haft eftir Putin í frétt AFP fréttaveitunnar.

Samkvæmt TASS fréttaveitunni, sem er í eigu rússneska ríkisins, á Putin ekki von á því að Rússland muni bregðast frekar við aðgerðum Bandaríkjanna. Hann sagði aðgerðir Bandaríkjanna vera byggðar á veikum grunni og og jafnvel ólöglegar.