Cech talar tungum í marki Arsenal

Petr Cech, markvörður Arsenal og tékkneska landsliðsins í fótbolta, er mikill tungumálamaður og hann nýtir sér það vel í fótboltanum.

Cech hefur nú sagt frá því að hann noti þrjú mismundandi tungumál þegar hann talar við varnarmenn sína hjá Arsenal og ekkert þeirra er hans móðurmál.

Petr Cech bætti met David James þegar hann hélt hreinu á móti Bournemouth í síðasta deildarleik ársins 2015 en enginn hefur nú haldið oftar hreinu í sögu ensku úrvalsdeildarinnar.

Petr Cech hefur átt magnaðan feril í enska boltanum og er margfaldur meistari með Chelsea en hann á nú góða möguleika á að vinna titla á sínu fyrsta tímabili með Arsenal.

Petr Cech talar fimm tungumál, tékknesku, ensku, frönsku, spænsku og þýsku, og það hefur komið sér vel í boltanum enda mikið af útlendingum í ensku liðunum. Cech nýtir sér tungumálakunnáttu sína í samskiptum sínum við varnarmennina.

„Ég tala við bakverðina (Nacho Monreal og Hector Bellerin) á spænsku, ég tala við Laurent Koscielny á frönsku og svo tala ég við Per Mertesacker á ensku af því að það kemur alveg eins út fyrir okkur tvo," sagði Petr Cech í viðtali við Mirror.

„Stundum vita erlendir leikmenn ekki hvað þú ert að segja. Það er því markvissara og öruggara að tala við þá á þeirra eigin tungumáli," sagði Cech.

Petr Cech var að mörgum talinn vera síðasta púslið sem Arsenal-liðið vantaði en liðið situr á toppi deildarinnar um áramótin. Það eru margir farnir að sjá það fyrir sér að Arsenal-liðið vinni enska meistaratitilinn í fyrsta sinn í tólf ár.

Petr Cech yfirgaf Chelsea þegar liðið var enskur meistari og á því möguleika á því að vinna enska titilinn tvö ár í röð með tveimur liðum.

„Það var ekki auðveld ákvörðun að fara frá Chelsea en ég vildi komast til liðs sem ætti möguleika á því að vinna. Ef ég hefði ekki trúað á það að Arsenal gæti unnið titilinn þá hefði ég aldrei komið hingað," sagði Cech.

„Ég spila ekki fótbolta aðeins vegna ánægjunnar að spila og keppa á móti bestu leikmönnunum því ég vil eiga möguleika á því að vinna leiki," sagði Cech. Hann vann enska meistaratitilinn fjórum sinnum með Chelsea og enska bikarinn vann hann líka fjórum sinnum frá 2004 til 2015.