Ein helsta vonarstjarna Þýskalands undir smásjá Man City

Leroy Sané, 19 ára leikmaður Schalke 04, er undir smásjánni hjá Manchester City. Þetta kemur fram í frétt the Guardian.

Samkvæmt fréttinni hefur City fylgst með Sané undanfarin tvö ár og ætlar að reyna að kaupa leikmanninn í félagaskiptaglugganum í janúar. Það gæti þó dregist fram á sumar.

Schalke hefur sett 40 milljóna evra verðmiða á Sané sem verður tvítugur ellefta þessa mánaðar.

Þessi efnilegi sóknarmiðjumaður hefur skorað fimm mörk í 19 leikjum fyrir Schalke á tímabilinu en hann skrifaði undir nýjan fjögurra ára samning við félagið síðasta sumar.

Sané lék sinn fyrsta A-landsleik fyrir Þýskaland þegar heimsmeistararnir töpuðu 2-0 fyrir Frökkum 6. nóvember síðastliðinn.