Ítalskur landsliðsmaður gæti verið á leið til Norwich

Samkvæmt frétt BBC hefur Norwich City gert Inter tilboð upp á 10 milljónir evra í ítalska landsliðsmanninn Andrea Ranocchia.

Ranocchia var fyrirliði Inter á síðasta tímabili en hann hefur fengið fá tækifæri í vetur og aðeins einu sinni verið í byrjunarliðinu í ítölsku úrvalsdeildinni.

Inter hefur fengið á sig fæst mörk í ítölsku deildinni á tímabilinu (11) og er vel sett með miðverði. Því er talið líklegt að félagið sé tilbúið að láta Ranocchia, sem hefur leikið 20 landsleiki fyrir Ítalíu, fara.

Norwich er í 15. sæti ensku úrvalsdeildarinnar með 20 stig, þremur stigum frá fallsæti.