Fellsmúlamálið: Konan gaf sig fram

Konan sem lögregla leitað að vegna málsins sem varðar ásakanir um frelsissviptingu í Fellsmúla gaf sig fram við lögreglu á öðrum tímanum í dag. Hún var yfirheyrð af lögreglu og látin laus að henni lokinni.

„Það þótti ekki ástæða til að halda henni,“ segir Grímur Grímsson, yfirlögregluþjónn á höfuðborgarsvæðinu, í samtali við Vísi um málið.

Lögreglan leitaði konunnar, sem er 22 ára, og 26 ára gamals karlmanns vegna rannsóknar málsins en þau eru búsett í íbúð á fjórðu hæð í Fellsmúla 9.

Karlmaður segir að honum hafi verið haldið þar gegn vilja í tvo sólarhringa.

Hann náði að láta lögreglu vita af sér í gær með því að klifra á milli svala á fjórðu hæð og komast þannig inn á stigagang í Fellsmúla 11. Þar fór hann niður á þriðju hæð þar sem íbúi hleypti honum inn til sín og leyfði honum að hringja á lögreglu.

Tveir menn voru handteknir í gær við Fellsmúla grunaðir um aðild að málinu. Þeim var sleppt í morgun þar sem rannsókn lögreglu hafði leitt í ljós að aðkoma þeirra að málinu var lítil sem engin.