Sjáðu IKEA-geitina loga

Eins og greint var frá í morgun var kveikt í IKEA-geitinni í nótt og brann hún til kaldra kola. Tilkynning um íkveikjuna barst lögreglu og slökkviliði um klukkan fjögur en fólkið sem kveikti í geitinni var elt uppi, fyrst af öryggisverði og svo af lögreglu, að því er segir í tilkynningu frá IKEA.

Þrír voru handteknir af lögreglu við Bústaðaveg í Reykjavík en tjónið er vel á aðra milljón króna. Brennuvargarnir verða kærðir og krafðir bóta.

Guðný Camilla Aradóttir, markaðs-og umhverfisfulltrúi IKEA, segir í samtali við Vísi að á myndbandsupptöku úr öryggismyndavélum, sem sjá má hér að ofan, sjáist tveir einstaklingar bera eld að geitinni.

Fyrst kemur einn maður með einhvers konar eldkokteil og hendir í geitina. Á eftir honum kemur annar maður að og skvettir miklu af eldfimum vökva á geitina. Annar þeirra fer síðan inn fyrir rafmagnsgirðinguna og er þá byrjað að loga ansi glatt í geitinni.

Tímafrekt og kostnaðarsamt að fá nýja geit

Að sögn Guðnýjar virðist fólkið sem kveikti í geitinni hafa verið meðvitað um það að öryggismyndavélar hafi verið í gangi því þau klipptu númeraplötur af bílnum sem þau komu á á staðinn.

Guðný segir að ekki sé búið að ákveða hvort að ný geit verði fengin í staðinn en í liðinni viku sagði Þórarinn Ævarsson, framkvæmdastjóri IKEA, að ef kveikt yrði í geitinni myndi ný geit ekki koma í staðinn enda er það bæði kostnaðarsamt og tímafrekt að fá nýja í geit.

Að sögn Guðnýjar er geitin gjöreyðilögð. Hún segir sorglegt að sjá brunarústirnar núna og að skemmdarfýsn sumra sé slík að engin virðing sé borin fyrir eigum annarra.

Eldheit saga geitarinnar

Jólageitin hefur eins og áður segir verið sett upp árlega seinustu átta ár en oftar en ekki hefur líftími hennar verið styttri en ætlast var til.

Árið 2010 var greint frá því að kveikt hefði verið í jólageitinni.  Slökkvilið kom á vettvang tíu mínútum síðar en þá voru brennuvargarnir á bak og burt. Þeir stóðust hins vegar ekki mátið og snéru til baka til að fylgjast með eldinum sem þeir höfðu kveikt. Þá var lögreglan hins vegar mætt og handtók þá undir eins. Forsvarsmenn IKEA buðu mönunum þó það sáttatilboð að sleppa þeim við kæru ef þeir tækju til eftir ósköpin.

Árið 2011 féll jólageitin í miklu óveðri sem þá reið yfir. Geitin skemmdist þó einungis lítillega í óveðrinu og var reist aftur við.

Árið 2012 var jólageitin brennd til kaldra kola öðru sinni. Þórarinn Ævarsson, framkvæmdastjóri Ikea, sagði í samtali við fréttastofu að tjónið væri metið á eina milljón króna.

Árið 2013 var frá því greint að veðrið hefði leikið jólageitina grátt. Mikið rok hafði verið á höfuðborgarsvæðinu og fór sökum þess svo að geitin féll á aðra hliðina.  

Í fyrra sagði Þórarinn í samtali við Vísi að sólarhringsgæsla væri í kringum geitina til að verja hana frá óprúttnum aðilum.

Það var þó ekki nóg til að bjarga geitinni frá vofveiflegum örlögum sínum en seinna í sama mánuði var greint frá því að jólageitin hefði tortímt sjálfri sér. Kviknaði þá í geitinni út frá útiseríu sem umvafði hana en geitin fuðraði upp á einungis nokkrum sekúndum í kjölfarið.