Innlent

Öryggisgæsla allan sólarhringinn á IKEA-geitinni

Kolbeinn Tumi Daðason skrifar
IKEA-geitin í allri sinni dýrð.
IKEA-geitin í allri sinni dýrð. Vísir/Stefán

Jólin eru komin í IKEA og komu raunar í gær. Verslunin er skreytt að innan sem utan en enn eitt árið er það sex metra há jólageit sem stelur senunni. Þórarinn Ævarsson, framkvæmdastjóri IKEA á Íslandi, segir að alltaf sé miðað við dagsetninguna 15. október. Þá reyni þeir að hafa búðina tilbúna að innan sem utan og sömuleiðis svæðið umhverfis verslunina.

Jólageitin fór einmitt upp í gær en óhætt er að segja að um frægustu geit landsins sé að ræða, og mögulega þá umdeildustu. Um sjö ára hefð er að ræða í Garðabænum. Af einhverjum sökum hafa óprúttnir aðilar gert tilraunir til að kveikja í henni undanfarin ár. Sumum hefur tekist ætlunarverk sitt en öðrum ekki.

Starfsmenn að koma geitinni upp við Kauptún í gær. Mynd/IKEA

Eldsprengjur og bensín
„Það var aðallega í byrjun. Þá fengum við tvö eða þrjú ár þar sem menn reyndu mjög stíft að kveikja í geitinni með eldsprengjum og bensíni. Þetta hefur verið heldur rólegra seinni ár,“ segir Þórarinn.

Þó hafi verið gerðar nokkrar tilraunir í fyrra en án árangurs. Ástæðan er mögulega öryggisgæslan en þar slær sænski húsgagnaframleiðandinn hvergi af.

„Við erum með sólarhringsgæslu á geitinni,“ segir Þórarinn. Bæði eru myndavélar sem snúa að geitinni auk þess sem rafmagnsgirðing er umhverfis hana.

„Maður gerir það sem þarf, eða það sem maður heldur að dugi,“ segir framkvæmdastjórinn.

„Menn þurfa að vera mjög útsjónasamir ef þeir ætla að ná að brenna geitina.“

Geitin í ljósum logum.

Skynsemin beri fólk ofurliði
Þórarinn telur geitina einnig hafa fengið meiri frið seinni ár eftir að jólaseríum var bætt á hana. Framleiðslukostnaður við seríurnar einn og sér sé um ein milljón króna. 

„Fólk er ragara þegar það sér hvað þetta eru mikil verðmæti. Nú sér fólk að það er hellings peningur í þessu. Ég held að skynsemin beri menn ofurliði.“

Hefðin er komin frá Svíþjóð og Þórarinn kann svo sannarlega að meta geitina.

„Mér finnst hún voðalega flott, sérstaklega þegar er komið myrkur og farið að snjóa aðeins á hana. Hún er ótrúlega skemmtilegt skraut. Hún er orðin tákn Kauptúnsins þótt hún standi á lóð IKEA,“ segir Þórarinn. Hann óttast ekkert skemmdarverk.

„Við höfum þá hefð að í hvert skipti sem geitin er brennd þá gerum við stærri geit næst. Hún byrjaði í fjórum metrum og er sex metrar núna og hefur fengið að vera það meira og minna óskemmd síðan.“





Tengdar fréttir

Sænska jólageitin fauk um koll

Sænska jólageitin við Ikea liggur nú á hliðinni en svo virðist sem veðrið hafi leikið geitina grátt. En mikið rok er sem stendur á höfuðborgarsvæðinu.

Brenndu jólageit Ikea - milljón króna tjón

"Geitin kostaði milljón,“ segir Þórarinn Ævarsson, framkvæmdastjóri Ikea, en jólageitin var brennd til grunna síðustu helgi, en hún var reyndar einnig brennd niður fyrir tveimur árum síðan.

Jólageitin féll í óveðrinu

Jólageit Ikea féll á hliðina í óveðrinu sem gekk yfir í gærkvöld og í nótt. Kristín Lind Steingrímsdóttir, markaðsstjóri Ikea, segir að geitin sé ekki mikið skemmd. Hún verði reist aftur um leið og veður leyfi, vonandi fyrir hádegi á morgun. Það á ekki af geitinni að ganga því að í fyrra var kveikt í henni.

Kveiktu í jólageitinni fyrir utan Ikea

Margra áratuga gömul sænsk jólahefð barst til íslands í nótt en þá kveiktu brennuvargar í jólageitinni sem staðið hefur fyrir utan Ikea í tvo mánuði. Brennuvargarnir náðust en framkvæmdastjóri Ikea segist í jólaskapi og ætlar ekki að kæra brennuvargana ef þeir hreinsa til eftir sig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.