Fordæma kjarnorkusprengingu Norður-Kóreumanna harðlega

Stjórnvöld víðs vegar um heim hafa fordæmt kjarnorkusprengingu Norður-Kóreumanna sem gerð var í norðausturhluta landsins nótt. Alþjóðakjarnorkumálastofnunin IAEA hefur harmað tilraunasprenginguna og segir hana vekja ugg.

Sprengjan er talin hafa verið mjög öflug og framkallaði jarðskjálfta sem mældist 5,3 stig. Sérfræðingar telja þetta hafa verið öflugasta tilraunasprenging Norður-Kóreumanna til þessa.

Þetta er í fimmta sinn sem Norður-Kóreumenn sprengja kjarnorkusprengju í tilraunaskyni þrátt fyrir hörð mótmæli annarra ríkja og viðamiklar viðskiptaþvinganir sem fylgt hafa í kjölfarið.

Park Geun-Hye, forseti Suður-Kóreu, hefur fordæmt sprenginguna og segir að með henni komi stjórnvöld í nágrannaríkinu verða fyrir frekari viðskiptaþvingunum og einangrun. „Svona ögranir munu flýta leið þeirra að sjálfstortímingu.“

Shinzo Abe, forseti Japan, hefur einnig brugðist harkalega við aðgerðum Norður-Kóreumanna og segir þær fullkomlega óásættanlegar fyrir Japan.

Kínversk stjórnvöld segjast mótfallin tilraunasprengingunni og hvetur Norður-Kóreumenn til að draga úr aðgerðum sem hafa versnandi áhrif á ástandið.

Franska forsetaskrifstofan fordæmir sprenginguna og hvetur öryggisráð Sameinuðu þjóðanna til að bregðast við. Barack Obama Bandaríkjaforseti hefur sömuleiðis sagt atburðurinn munu hafa alvarlegar afleiðingar í för með sér.