Franski skriðdrekinn að yfirgefa Leicester

Leicester samþykkti tilboð frá Chelsea í franska landsliðsmanninn N’Golo Kante í gær en samkvæmt enskum miðlum mun Chelsea greiða tæplega þrjátíu milljónir punda fyrir Kante.

Kante kom eins og stormsveipur inn í deildina er Leicester varð enskur meistari í fyrsta sinn í vor en Leicester greiddi aðeins 5,5 milljónir fyrir þjónustu hans fyrir aðeins ári síðan.

Kante lét forráðamenn Leicester vita í gær að hann væri á förum frá félaginu til Chelsea en hann verður önnur kaup Chelsea undir stjórn Antonio Conte á eftir Michy Batshuayi.

Hann verður fyrsti lykilleikmaðurinn sem yfirgefur ensku meistarana en Jamie Vardy, framherji liðsins, ákvað að neita Arsenal og taka slaginn aftur með Leicester í vetur.