Birni Steinbekk miðasölumanni er úthúðað á internetinu.

Öll góð ævintýri þurfa þorpara og í tengslum við EM-ævintýri Íslands hefur einn maður öðrum fremur gert tilkall til þess hlutverks, hvort sem honum líkar betur eða verr. Nefnilega Björn Steinbekk miðasölumaður. Björn fær það óþvegið á Internetinu og ef ekki væri fyrir ógætileg orð FH-ingsins Steven Lennons á Twitter, væri hann nú einn að ganga þau svipugöngin; hvar Íslendingar fá útrás eftir ofurjákvæðni undanfarinna daga og vikna.

Vísir hefur fjallað ítarlega um málið sem nú er til rannsóknar lögreglu en það snýst um að tugir ef ekki á annað hundruð Íslendinga, sem höfðu keypt miða af Birni, voru svikin um þá þegar til kastanna kom. Og komust því ekki á leik Íslands og Frakklands, sátu á röngum stað eða mættu alltof seint. Leikurinn er líkast til hápunktur íslenskrar knattspyrnusögu.

Björn sjálfur segist í samtali við Ríkisútvarpið vera fórnarlambið í málinu, hann hafi verið svikinn um miðana. Hann segist hafa verið svikinn af Knattspyrnusambandi Evrópu og íhugar málaferli. Vísir fer yfir það sem Björn hefur til málanna að leggja hér.

Á ekki von á góðu
En, reiðin sem að honum snýr og birtist á Facebook er áþreifanleg.

Þannig er söngkonunni og fótboltaáhugamanninum Helgu Möller ekki skemmt og hún talar fyrir munn margra.

Er Björn nýr Lúkas?
Í raun eru mörg ummælin sem finna má um Björn á Facebook vart birtingarhæf. Í Facebookhópi sem heitir „Ferðagrúppa fyrir EM 2016“ er sannkölluð reiðialda sem gengur yfir, sem beinist að Birni. Þar eru honum ekki vandaðar kveðjurnar. Þó eru einhverjir sem velta því fyrir sér hvort hér sá í uppsiglingu nýtt Lúkasarmál? (Þegar reiðialda reis vegna meints hundadráps sem reyndist svo ekki á rökum reist.)

En, þar er á það bent að ekki sé nú sannfærandi að fullyrða að UEFA sé að útvega miða fyrir svartamarkaðsbrask? „Hann ætlaði nú fyrst að stinga af með mikið af þessum miðum í rassvasanum áður en nokkrir Íslendingar sáu glitta í þá og heimtuðu að fá þá!“ Upphrópunarmerking eru ekki spöruð í dag.

Hvernig viltu hafa þetta Björn?
Og þar er að finna þessa frásögn sem kjarnar líðan fólks. Stefán Svan skrifar:

Fífl og svikari
Fréttastofu Vísis hefur ekki tekist að ná í Björn Steinbekk að heitið geti. Og hann hefur ekki reynt að svara þeim sem eru honum reiðir á netinu. Þó má sjá spor hans þar, því hann hefur hreinsað rækilega til á Facebookvegg sínum. Vísir tók hins vegar, í bríaríi, afrit af þeim. Ýmis ummæli sem mátti þar sjá í gærkvöldi eru horfin. Björn birti til að mynda mynd af leikvelli en þar við er ritað: „Hvar fékkst þú miða fíflið þitt?“ Og: „Þú finnst.“ Að auki: „Svikari.“ Allt þetta er nú horfið sem og auglýsingar hans á Facebookvegg hans, svo sem:

Next stop PARIS
„Ég á þrjá miða eftir á leikinn. besta stað, bestu sæti möguleg. Nenni ekki að selja einhverjum bretum,“ skrifaði Björn.

Og í einni færslunni sem nú er horfin en er frá 30. júní er Björn bjartsýnn og ánægður með gang mála:

„Jæja...í dag höfum við hjálpað meira en 300 íslendingum að komast á leikinn. Það eru afar fáir miðar eftir og óvíst hvort fleiri séu í boði. Vodafone er ítrekað að minna mig á mikla erlenda notkun,“ skrifar Björn og segir vinnuálagið mikið. „Við hættum væntanlega að selja seinnipartinn á morgun þannig að ef það vantar látið vita. Next stop PARÍS.“