Birgitta: Ekki að reyna verða næsti forsætisráðherra

Birgitta Jónsdóttir, þingmaður Pírata, segir í sjónvarpsviðtal við ABC news í Ástralíu sem tekið var í gær að hún sé ekki að falast eftir því að verða næsti forsætisráðherra landsins.

Samkvæmt nýlegum skoðanakönnunum Gallup hafa Píratar mælst með um 30 – 36% fylgi en í viðtalinu segist Birgitta ekki búast við því að flokkurinn fái svo góða kosningu. Hún segist fyrst og fremst trúa á þingræði og að hún sé því í hugsjón á móti því að einn flokkur hafi slíkan meirihluta á þingi.

„Það getur allt gerst en ég er ekki að reyna verða forsætisráðherra. Því ég er hreinlega ekki viss um að ég sé best til þess fallin,“ segir Birgitta í viðtalinu. „Forsætisráðherra þarf að búa yfir persónueiginleikum sem við höfum ekki séð í fyrrum forsætisráðherra né í núverandi. Þetta er svakalegt verkefni. Fólk er orðið þreytt á því að hafa fólk í þessari stöðu sem tvístra þjóðinni. Ég er mjög umdeild manneskja, þannig að kannski er ég ekki sú rétta til þess að verða forsætisráðherra.“

Í viðtalinu er hún einnig spurð um hvort hún myndi bjóða Julian Assange hæli á Íslandi yrði hún forsætisráðherra. Hún svarar því á þann hátt að hún myndi mæla með því að Assange og Edward Snowden myndu sækja hér um ríkisborgararétt. Það yrði þá lagt fyrir þingið sem tæki ákvörðun.

Eftir viðtalið vakna upp spurningar hvernig málum er háttað hjá Pírötum ef skyldi koma að því að manna í ráðherrastóla.

„Við erum bara ekki komin það langt,“ segir Birgitta í spjalli við Vísi. „Persónulega þætti mér töff ef við myndum bæði ræða um það, þegar nær dregur, en það væri líka gaman að heyra vilja þjóðarinnar.“

Í nýlegri skoðanakönnun RÚV kom fram að 6% myndu vilja sjá Helga Hrafn Gunnarsson sem forsætisráðherra á meðan 3% myndu vilja sjá þig. Mynduð þið gera aðra skoðanakönnun eða hvernig gætuð þið hugsað ykkur að vinna þetta?

„Ég held að við myndum bara skoða það hver passar best hvar. Við eigum eftir að sjá aðra frambjóðendur þar sem við erum ekki komin með prófkjör. Þannig að mér finnst svolítið frumhlaup að stilla sér inn í einhverja stóla. Það er ekki viðeigandi.“

Þið bjuggust kannski ekkert endilega við að þurfa fara hugsa fyrir þessu?

„Nei, og mér finnst óþægilegt að alþjóðapressan skuli alltaf stilla því þannig upp að ég sé að sækjast eftir forsætisráðherraembættinu. Ég er alltaf að reyna leiðrétta þetta. En það er eins og að ýta fíl upp fjall. Þá útskýrir maður hvernig vil virkum. Það er kannski bara líka ágætis tækifæri til þess að fá að útskýra hvernig flokkurinn virkar.“

Myndi koma til greina að ráða fagmenn utanflokka til þess að manna ráðherrastóla?

„Ég veit ekki alveg hvað fagaðili í ráðuneyti er. Sá sem er ráðherra er í raun lobbý-isti til þess að reyna framkvæma ákveðna stefnu. Við eigum bara eftir að fara í mikla umræðu innan flokksins. Ég treysti mér ekki til þess að koma með einhverjar afgerandi skoðanir á slíku fyrr. Ég held að það væri mjög gott ef það væru mjög skýrar línur á öllu svona fyrir kosningar, þannig að fólk myndi vita að hverju það væri að ganga.“

Birgitta segir að lokum að flokkurinn ætti ekkert endilega að vera spegla sig út frá núverandi valdakerfi. „Ég er mest hrifin af því að við skoðum einfaldlega hver gæti verið mest öflugur í fjárlaganefnd eða öðru slíku. Ég er mikill þingræðissinni því mér finnst það vald vera næst fólkinu.“