Klopp lætur það ekki pirra sig að vera kallaður mjúki Þjóðverjinn

Jürgen Klopp, knattspyrnustjóri Liverpool, lét ummæli Sam Allardyce, knattspyrnustjóri Sunderland, ekki fara í taugarnar á sér.

Allardyce kallaði hann "soft German" upp á enska tungu eða mjúka Þjóðverjann á íslenskunni.

Liverpool vann leikinn 1-0 Klopp reiddist mjög yfir því að Jeremain Lens hjá Sunderland fékk ekki rauða spjaldið fyrir ruddatæklingu á Mamadou Sakho.

„Þetta er ekkert vandamál. Fullt af fólki hefur sagt miklu verri hluti um mig en þetta. Þetta er ekki í fyrsta skiptið," sagði Jürgen Klopp á blaðamannafundi aðspurður um viðurnefnið frá Sam Allardyce.

„Ef þið horfið bara aftur á þessa tæklingu þá sjáið þið að ég var ekki á neinum villigötum með því að bregðast svona við," sagði Klopp. Hann segir atvikið heyra nú sögunni til.

„Mama er á lífi og allt er í lagi. Það er það eina sem ég vil segja um þetta. Ég tek það samt fram að ég var ekki að rífast neitt við bekkinn hjá Sunderland," sagði Klopp.

Sigur Liverpool á Sunderland á leikvangi ljóssins kom liðinu upp í sjöunda sæti í töflunni en liðið er nú fimm stigum frá sæti í Meistaradeildinni.

Næsti leikur Liverpool er á móti West Ham en Hamrarnir vildu fá Jürgen Klopp sem knattspyrnustjóra í sumar. Slaven Bilic var ráðinn þegar Klopp sagði nei og liðið er að gera flotta hluti undir hans stjórn.

„Ég var ekki laus í sumar. Ég er heppinn með það að það hafa fullt af félögum áhuga á því að fá mig. West Ham er góður klúbbur en þetta var ekki réttur tími fyrir mig ekki frekar en hjá hinum félögunum," sagði Klopp og endaði síðan á einni Klopp-klassík.

„Hamrarnir (gælunafn West Ham), það er mun betra viðurnefni fyrir mig en mjúkur," sagði Klopp.