Aguero hetja Manchester City á Vicarage Road | Sjáðu mörkin

Sergio Aguero var hetja Manchester City í 2-1 sigri á Watford á Vicarage Road í dag en Manchester City sneri taflinu við með tveimur mörkum með skömmu millibili stuttu fyrir lok leiksins.

Eftir 1-0 sigur Arsenal á Newcastle fyrr í dag mátti Manchester City ekki við því að tapa stigum í baráttunni um enska titilinn en nýliðar Watford voru ekki á því að gefa neitt eftir.

Watford komst yfir á 55. mínútu leiksins þegar serbneski bakvörður Manchester City, Aleksandr Kolorov, varð fyrir því óláni að skalla boltann í eigið net eftir hornspyrnu Ben Watson.

Í raun benti lítið til þess að Manchester City myndi jafna metin þegar jöfnunarmarkið kom á 82. mínútu en þá stýrði Yaya Toure hornspyrnu Kolorov í netið af stuttu færi.

Jöfnunarmarkið virtist slá leikmenn Watford af laginu en aðeins tveimur mínútum síðar skoruðu leikmenn Manchester City sigurmarkið og var þar að verki Aguero með góðum skalla eftir fyrirgjöf Bacary Sagna.

Lauk leiknum með 2-1 sigri Manchester City en þetta var fyrsti sigur Manchester City á útivelli í ensku úrvalsdeildinni í tæpa fjóra mánuði.

Manchester City situr áfram í 3. sæti eftir leikinn en með sigrinum saxaði Manchester City á forskot Arsenal og Leicester í efstu tveimur sætum deildarinnar.

Yaya Toure jafnar metin: Agüero skorar sigurmarkið: