Setur staðgöngumæðrun undir sama hatt og kynferðisbrot

Angelino Alfano, innanríkisráðherra Ítalíu, hefur valdið usla í heimalandi sínu með ummælum sínum um staðgöngumæðrun en hann vill að komið verði fram við þá sem nýta sér staðgöngumæðrun á sama hátt og komið er fram við kynferðisbrotamenn.

„Staðgöngumæðrun er andstyggilegasta og ólöglegasta form verslunar sem maðurinn hefur fundið upp á,“ sagði Alfano í viðtali við ítalskt dagblað.

Alfano er á móti auknum réttindum samkynhneigðra og ógiftum pörum en Ítalía er eina stóra vestræna ríkið sem neitar samkynhneigðum pörum um réttindi á borð við það að verða foreldrar.

Staðgöngumæðrun er ólögleg í Ítalíu og nemur refsingin allt að tveggja ára fangelsi. Grátt svæði hefur þó myndast á þessu sviði enda er fólki sem sækir í staðgöngumæðrun í öðrum löndum og kemur svo með barnið heim til Ítalíu ekki refsað.

Alfano fer fyrir litlum flokki í samsteypustjórn Ítalíu og er flokkurinn alfarið á móti staðgöngumæðrun.

„Við viljum að staðgöngumæðrun verði glæpur, alveg eins og kynferðisbrot,“ sagði Alfano .

Ekki er víst hvernig harðlínustefna Alfano leggist í Matteo Renzi, forsætisráðherra Ítalíu, sem hefur lofað samkynhneigðum á Ítalíu auknum réttindum.