Wenger: Vanvirðing hjá Mourinho

Arsene Wenger, stjóri Arsenal, lýsti óánægju sinni með ummæli sem hann Jose Mourinho, kollegi sinn hjá Chelsea, lét falla eftir leik liðanna um síðustu helgi.

Liðin skildu jöfn í markalausum leik og Chelsea færðist nær enska meistaratitlinum sem liðið getur tryggt sér um helgina.

Stuðningsmenn Arsenal sungu um „leiðinlegt“ lið Chelsea (e. boring, boring Chelsea) í leiknum og Mourinho brást við því á blaðamannafundi eftir leikinn.

„Maður styður þetta félag og bíður svo í mörg ár eftir meistaratitli. Það er mjög leiðinlegt,“ sagði Portúgalinn umdeildi.

Wenger tjáði sig um málið á blaðamannafundi í dag. „Aðalmálið er að knattspyrnustjórar beri virðingu fyrir öðrum knattspyrnustjórum. Sumir verða að bæta sig í því.“

„Það eru allir að glíma við sín innri vandamál og ég er að glíma við mín. Það er nóg.“