Pabbi nýja Liverpool-stráksins tók vegabréfið af honum

Ef marka má viðtal sem birtist við faðir Marko Grujic í serbneska blaðinu Blic í dag er hann afar ósáttur við að sonur hans hafi verið seldur til Liverpool.

Grujic er nítján ára Serbi sem varð heimsmeistari með U-20 liði Serba í sumar. Rauða stjarnan frá Belgrad hefur staðfest að það hafi tekið tilboði Liverpool upp á 5,1 milljón punda í kappann, jafnvirði um 988 milljóna króna.

„Allir hjá Rauðu stjörnunni hefðu viljað halda Marko Grujic í tíu ár en fjárhagsstaða félagsins neyðir okkur til að taka aðra ákvörðun,“ sagði í yfirlýsingu félagsins.

Sjá einnig: Klopp búinn að ganga frá fyrstu kaupunum sem stjóri Liverpool

Grujic eldri, Goran, telur að það muni eyðileggja son hans að fara til Englands. Hann segir að eina ástæðan fyrir því að Rauða stjarnan í Belgrad hafi samþykkt að selja strákinn er að félagið eigi í fjárhagsvandræðum.

„Þeim tókst að sannfæra hann um að skrifa undir samninginn eftir að hafa hringt í hann tíu sinnum á dag,“ sagði faðirinn í umræddu viðtali.

„Það er líka verið að þrýsta á hann í búningsklefanum. Sumir leikmenn telja að þeir fái ekki greidd laun nema að félagið selji leikmenn.“

„Ég er með vegabréfið hans og lýsi því yfir að Marko er ekki á leiðinni neitt,“ sagði Goran en óvíst er að það dugi til að koma í veg fyrir vistaskipti drengsins.

Hann bendir á mörg dæmi þess að ungir serbneskir leikmenn hafi ekki náð að spjara sig í Englandi. „Bojan Djorjic, Milos Veljkovic, Adem Ljajic, Zoran Tosic, Lazar Markovic, Danilo Pantic. Á ég að halda áfram?“

„Svo eru það Branislav Ivanovic og Nemanja Vidic. Báðir komu til Englands sem reyndir leikmenn,“ bætir hann við.

„Þekktu barnið þitt. Ég veit að hann hefur hæfileikana til að spila í Englandi en þetta er ekki deildin fyrir hann núna.“