Van Gaal gekk út af blaðamannafundi

Blaðamannafundur Louis van Gaal hjá Manchester United stóð yfir í aðeins fimm mínútur í dag.

Van Gaal hefur verið mikil til umfjöllunar í enskum fjölmiðlum og sagður afar valtur í sessi eftir slæmt gengi liðsins að undanförnu.

Jose Mourinho hefur verið orðaður við starf hans en umboðsmaður hans neitar að Portúgalinn hafi átt í viðræðum við Manchester United.

Van Gaal neitaði að svara spurningum fulltrúa ensku blaðanna og tók aðeins við spurningum fulltrúa ljósvakamiðla. Síðan gekk hann út en fundurinn stóð yfir í aðeins fimm mínútur.

Hann sagði þó að hann nyti enn stuðnings Ed Woodward, David Gill og Alex Ferguson og bætti svo eftirfarandi við:

„Er enginn hér sem þarf að biðja mig afsökunar?“