Svona á Elliðaárvogs- og Ártúnshöfðasvæðið að líta út

Tillaga Arkís, Landslags og Verkís um rammaskipulag Elliðaársvogs og Ártúnshöfða var valin til verðlauna eftir hugmyndasamkeppni Reykjavíkurborgar. Niðurstaðan er vistvænt borgarhverfi með fólk í fyrirrúmi.

Tillaga unnin af Arkís arkitektum ehf, Landslagi ehf, Verkís hf með aðstoð Dr. Bjarna Reynarssonar uppfyllti best og flest markmið aðalskipulags Reykjavíkur og önnur markmið sem koma fram í keppnislýsingu Reykjavíkurborgar um rammaskipulag Elliðaárvogs - Ártúnshöfða. Það sem einkennir hana er áhersla á lýðheilsu, sjálfbærni og vistvæna hugsun. Blönduð borgarbyggð verður á svæðinu með ríkan staðaranda að því er segir á heimasíðu Reykjavíkurborgar.

„Þetta er stór stund en aðdragandinn spannar tíu ár. Elliðaárvogs-Ártúnshöfða svæðinu var skipt í fjóra hluta í aðalskipulagi Reykjavíkur. Vogabyggðin er einn þeirra og í þessari hugmyndasamkeppni voru hin svæðin undir í framhaldi af Bryggjuhverfinu. Þetta er feikilega stórt svæði sem mun byggjast upp í áföngum,“ sagði Dagur B. Eggertsson borgarstjóri áður en opinberað var hver var hlutskarpastur í gær.

Samkeppnin var lokuð hugmyndasamkeppni um rammaskipulag. Valdir voru fimm aðilar að undangengnu forvali og voru það Batteríið arkitektar, Teiknistofan Storð, VSB verkfræðistofa. Karl Kvaran, OLGGA ofl. Arkís arkitektar, Landslag, Verkís. Gláma Kím, Kurtogpís, Efla, Studio Vulkan. Teiknistofan Tröð, Mannvit.

Aðlagandi og fjölbreytt almenningsrými

Björn Axelsson skipulagsfulltrúi Reykjavíkurborgar kynnti niðurstöður dómnefndar. Niðurstaðan var að allar fimm tillögurnar væru vel unnar og tækju með heilsteyptum og áhugaverðum hætti á þeim viðfangsefnum sem skilgreind voru í samkeppnislýsingu. Tillaga unnin af Arkís arkitektum ehf, Landslagi ehf, Verkís hf með aðstoð Dr. Bjarna Reynarssonar varð fyrir valinu

„Hún skapar skýrar einingar í heildstæðu hverfi með margvíslegri útfærslu byggðarreita sem býður upp á fjölbreyttar húsagerðir, gerir ráð fyrir aðlaðandi og fjölbreyttum almenningsrýmum og góðu samspili sjávar, lands og byggðar, staðsetur verslun og þjónustu m.t.t. samgönguáss og í göngufjarlægð frá öllum íbúðum, tekur tillit til landslags og umhverfis og stuðlar að fjölbreytileika þess.“

Reykjavíkurborg efndi í lok árs 2014 til hugmyndasamkeppni um þetta rammaskipulag en ætlunin er að stækka Bryggjuhverfið og endurskoða skipulag svæðisins á Ártúnshöfða þannig að það geti þróast og öðlast nýtt hlutverk sem blönduð byggð búsetu og atvinnu segir á heimasíðu borgarinnar.

„Svæðið er eitt af lykil uppbyggingarsvæðum í borginni og gegnir mikilvægu hlutverki gagnvart því markmiði aðalskipulagsins að þétta byggð í borginni, m.a. þykir af þeim sökum tímabært að hefja vinnu við endurþróun þess, en fyrirsjáanlegt er að verkefnið er í heild sinni langtímaverkefni.“

Meginmarkmið samkeppninnar hafi verið m.a. að leita vistvænna skipulagslausna fyrir svæðið, sem er lykilþróunarsvæði í aðalskipulagi Reykjavíkur 2010-2030. Þá hafi verið leitað að framsæknum hugmyndum um fyrirkomulag nýrrar blandaðrar byggðar þar sem lögð sé áhersla á heildstæðar götumyndir og borgarmiðað gatnakerfi. Stuðla eigi að góðu samspili fjölbreyttra almenningsrýma, bygginga og nærumhverfis, nýta þær byggingar sem fyrir eru, í nýju og/eða breyttu samhengi, eftir því sem kostur sé og við eigi. Þá átti að bera virðingu fyrir umhverfi og auðlindum og nærliggjandi náttúrusvæðum.

Framlenging á útvistarsvæði í Elliðaárdal

Meginkjarnar byggðarinnar í tillögunni myndast við torg þar sem Breiðhöfðinn sker Stórhöfða (Krossmýrartorg) og Sævarhöfða (Bryggjutorg). Efri byggðin nýtur útsýnis og almenningsgarða og torga, en sú neðri nálægðar við sjó og aðliggjandi náttúruperlur í Elliðaárdal og Grafarvogi. Svæðin njóta nálægðar hvort við annað. Geirsnefi verður umbreytt í skjólgott og fjölbreytilegt útivistarsvæði fyrir aðliggjandi byggð og sem framlenging á útivistar- og náttúrusvæðinu í Elliðaárdal. Samtals reiknar tillagan með u.þ.b. 816.200 m² viðbótarbyggingarmagni og 5100 íbúðum í 3-5 hæða húsum.

Dómnefndarfulltrúar voru Björn Axelsson formaður, fyrir hönd umhverfis- og skipulagssviðs Magnea Guðmundsdóttir, fyrir hönd umhverfis- og skipulagsráðs, Áslaug María Friðriksdóttir, fyrir hönd umhverfis- og skipulagsráðs, Björn Ólafs og Matthildur Kr. Elmarsdóttir, fyrir hönd Arkitektafélags íslands. Lilja Grétarsdóttir arkitekt og verkefnisstjóri hjá skipulagsfulltrúa var ritari dómnefndar. Helga Guðjónsdóttir var trúnaðarmaður, tilnefnd af Arkitektafélagi Íslands.