Coutinho er á sömu leið og Suarez

Brendan Rodgers, stjóri Liverpool, er hæstánægður með frammistöðu Brasilíumannsins Philippe Coutinho í síðustu leikjum.

Coutinho tryggði Liverpool nauman sigur á Bolton í ensku bikarkeppninni í gær og hefur verið í fínu formi í síðustu leikjum.

„Maður er til í að borga pening til þess að sjá þennan strák spila fótbolta," segir Rodgers en hann spáir því að Coutinho eigi eftir að verða einn af þeim bestu.

„Hann verður kominn í heimsklassa eftir tvö ár. Luis Suarez bætti sig stöðugt hjá okkur og ég sé Coutinho feta sömu slóð."

Coutinho er nýbúinn að skrifa undir nýjan langtímasamning við Liverpool.