Stuðningsmenn Leicester fá frían bjór á næsta heimaleik

Eigendur Leicester City hafa ákveðið að þakka stuðningsmönnum liðsins fyrir stuðninginn á árinu með því að gefa öllum sem mæta á heimaleik Leicester gegn Manchester City á þriðjudaginn einn frían bjór.

Gengi liðsins hefur einfaldlega verið ótrúlegt á þessu ári en á sama tíma fyrir ári síðan virtist liðið vera á beinni leið aftur niður í Championship deildina.

Eftir að hafa bjargað sér fyrir horn á lokasprettinum á síðasta tímabili hafa leikmenn Leicester komið öllum á óvart og tróna á toppi ensku úrvalsdeildarinnar að sautján umferðum loknum.

Hafa eigendurnir, Vichai og Aiyawatt Srivaddhanaprabha, ákveðið í tilefni þess að bjóða stuðningsmönnum liðsins sem mæta á leikinn upp á einn bjór til þess að fagna frábærum árangri á árinu.