Allardyce: Ætlum að bæta í leikmannahópinn

Sam Allardyce, knattspyrnustjóri Sunderland, ætlar að bæta í leikmannahóp liðsins í félagaskiptaglugganum sem opnar á nýju ári.

"Vonandi getum við gengið frá einum félagaskiptum snemma í janúar," sagði Allardyce sem tók við Sunderland af Dick Advocaat í október.

"Við erum að líta á ýmsar stöður og ýmsa leikmenn. Við þurfum að skoða hvaða leikmenn, og hvernig leikmenn, standa okkur til boða og hvort þeir vilji koma til Sunderland?

"Við höfum verið að skoða þessi mál undanfarnar vikur," bætti Allardyce við.

Sunderland situr í 19. og næstneðsta sæti ensku úrvalsdeildarinnar með 12 stig, fimm stigum frá öruggu sæti.

Svörtu kettirnir hafa tapað þremur leikjum í röð en fá tækifæri til að komast aftur á sigurbraut þegar þeir sækja Manchester City heim á öðrum degi jóla.