Hóf skothríð í kvikmyndahúsi

Tvær konur létu lífið í skotárás í kvikmyndahúsi í bænum Lafayette í Lousiana í Bandaríkjunum á fimmtudag.

Árásarmaðurinn, John Russel Houser, hafði keypt miða á grínmyndina Trainwreck. Þegar um 20 mínútur voru liðnar af myndinni hóf hann skothríð í salnum með þeim afleiðingum að tvær konur létust.

Ef ekki hefði verið fyrir einn áhorfandanna sem setti brunabjöllu í gang hefði Houser eflaust getað valdið meiri skaða. Lögregla var afar fljót að bregðast við en fyrstu lögregluþjónar voru mættir á staðinn einungis mínútu eftir að brunabjallan fór af stað.

Þegar Houser sá að honum yrði ekki undankomu auðið beindi hann byssunni að sjálfum sér og svipti sig lífi.