Bony veiktist af malaríu

Wilfried Bony, framherji Manchester City, hefur ljóstrað því upp af hverju hann fór ekki með liðinu til Ástralíu og Víetnam á undirbúningstímabilinu.

Ástæðan er sú að Bony veiktist af malaríu en hann greindi frá þessu eftir 5-1 sigur City á Bournemouth í gær.

„Ég er búinn að snúa blaðinu við. Ég glímdi við meiðsli og veikindi en það tilheyrir fortíðinni,“ sagði Bony sem skoraði tvö mörk og lagði upp eitt í sigrinum á Bournemouth.

Bony hefur ekki alveg fundið sig eftir að hann var keyptur til City frá Swansea í janúar fyrir allt að 28 milljónir punda en frammistaðan í gær gefur góð fyrirheit fyrir framhaldið.

Bony hefur alls skorað fjögur mörk í 17 deildarleikjum fyrir City en hann skoraði 25 deildarmörk á einu og hálfu tímabili með Swansea.