Van Gaal: Fjölmiðlar að skrifa og segja hluti sem eiga sér ekki stoð í raunveruleikanum

Louis van Gaal, stjóri Manchester United, var brúnaþungur á brún eftir 2-0 tap United gegn Stoke í fyrsta leik dagsins í enska boltanum. Þetta var fjórða tap United í röð í öllum keppnum.

„Pressan er núna stóra málið. Ég mun reyna gera allt, en pressan verður meiri og meiri með hverjum leiknum og við verðum að leysa það vandamál," sagði Van Gaal í samtali við Sky Sports í leikslok.

„Þetta er enn erfiðara því ég er einnig hluti af þessu að við höfum tapað fjórum leikjum í röð svo fólk lítur á mig."

„Ég verð að díla við það, en það sem skiptir meira máli er að leikmennirnir verða að díla við þetta því þeir þurfa að framkvæma," sagði Van Gaal og var ekki hættur:

„Þú ert ekki að skilja hvað ég er að segja. Skilaboð mín eru þau að fjölmiðlar eru að segja og skrifa hluti sem eiga sér ekki stoð í raunveruleikanum hjá Manchester United," sagði Hollendingurinn að lokum.

Fróðlegt verður að fylgjast með fréttum dagsins og sjá hvort Hollendingurinn fái reisupassann. Jose Mourinho hefur verið mikið orðaður við starfið sem og Ryan Giggs, núverandi aðstoðarþjálfari United.