Ward vill fá markvarðarstöðuna hjá Liverpool

Hinn 22 ára gamli markvörður Danny Ward snýr aftur í herbúðir Liverpool eftir áramót og gæti fengið tækifæri í markinu.

Bæði Simon Mignolet og Adam Bodgan hafa ekki þótt nógu traustir í búrinu hjá Liverpool og margir eru spenntir fyrir því að gefa Ward tækifæri.

Hann var sendur á lán til skoska liðsins Aberdeen í sumar og hefur haldið hreinu í níu leikjum af tuttugu. Spilað virkilega vel fyrir liðið sem er aðeins stigi á eftir toppliði Celtic.

„Það er minn metnaður að verða aðalmarkvörður Liverpool. Ég hef trú á því að ég geti spilað með þeim bestu,“ sagði Ward með sjálfstraustið í botni.

„Liverpool gaf mér langan samning og ég tók því sem svo að félagið hefði trú á því að ég gæti orðið aðalmarkvörður félagsins. Ég hef verið að taka réttu skrefin og þarf að halda því áfram."