Ranieri: Við erum kjallarinn - önnur lið eru glæsivillur

Claudio Ranieri, stjóri Leicester, var ánægður með frammistöðu sinna manna í markalausu jafntefli liðsins gegn Manchester City í ensku úrvalsdeildinni í kvöld.

Úrslitin þýða að Leicester er í öðru sæti deildarinnar, jafnt Arsenal en með verri markatölu. City er svo í þriðja sætinu, þremur stigum á eftir toppliðunum.

Sjá einnig: Leicester komst ekki aftur á toppinn

„Þetta var erfitt. Við spiluðum vel og sköpuðum færi,“ sagði Ranieri en Leicester tapaði á dögunum fyrir Liverpool. „Ég vildi sjá viðbrögð leikmanna við því tapi og það var gott.“

Hann segir að enska úrvalsdeildin sé furðuleg þetta tímabilið en þar nægir að nefna óvænta velgengni Leicester og hrap Englandsmeistara Chelsea sem eru aðeins nokkrum stigum frá fallsæti.

„Þessi deild er alveg brjáluð. Það vill enginn vinna deildina. Það er afar furðulegt,“ sagði hann. „Við erum kjallarinn og önnur lið eru glæsivillur með sundlaug. Þetta er ekki auðvelt en við viljum veita öllum liðum samkeppni.“

„Það sem okkur hefur tekist að gera er kraftaverki líkast. Ég vildi gjarnan að það myndi halda áfram en það verður ekki auðvelt fyrir okkur. Ég vil að leikmenn haldi áfram að berjast eins og þeir gerðu í kvöld.“

„Þetta er frábært. Ég get aðeins hrósað mínum leikmönnum og stuðningsmennirnir okkar eru ótrúlegir. Þeir styðja okkur og hvetja okkur áfram.“