Eiganda Leeds United finnst liðið sitt vera of oft í sjónvarpinu

Sjónvarpsmenn Sky fá ekki leyfi til að koma inn á Elland Road í dag en þeir ætluðu að stilla upp fyrir útsendingu frá leik Leeds United í ensku b-deildinni.

Leeds United tekur á móti Derby County í kvöld og er þetta í níunda skiptið á tímabilinu þar sem leikur Leeds-liðsins hefur verið valinn fyrir beina sjónvarpsútsendingu hjá Sky-sjónvarpsstöðinni.

Massimo Cellino, ítalskur eigandi Leeds United, hefur skipað starfsfólki sínu að banna sjónvarpsmönnum að koma inn á leikvanginn með tækin sín.

Cellino finnst að Leeds United sé alltof oft í sjónvarpinu og að það hafi neikvæð áhrif á áhorfendaaðsókn á leiki liðsins.  Leeds United er í þriðja sæti yfir bestu aðsóknin í deildinni og er að fylla að meðaltali um 58 prósent sæta á Elland Road.

Fulltrúar frá enska sambandinu eru að reyna að leysa málið samkvæmt frétt á BBC enda eru samningar í gildi á milli enska sambandsins og Sky. Massimo Cellino hefur því lögin ekki með sér og í raun engan rétt á því að loka dyrunum á Sky-menn.

Leeds United er þó ekki það félag sem hefur verið oftast í sjónvarpinu því það er þegar búið að sýna níu leiki beint með Nottingham Forest.

Það er aftur á móti langt í næstu lið en tveir leikir hafa verið sýndir með Preston, Brentford, Bristol City, Charlton, Rotherham og MK Dons.

Massimo Cellino verður ekki sjálfur á leiknum í kvöld, væntanlega að fagna jólunum heima á Ítalíu, og samkvæmt þessum fréttum þá mun hann ekki heldur ætla að horfa á leikinn í sjónvarpinu.

Leeds United er aðeins í 14. sæti ensku b-deildarinnar en gæti komist upp í 11. sæti með sigri í leiknum í kvöld.