Sagði að ég spilaði eins og stelpa

Romelu Lukaku, framherji Everton, ákvað að skipta um umboðsmann í apríl á þessu ári og semja við Mino Raiola eftir að Ítalinn lét hann heyra það.

Raiola er einn skrautlegasti umboðsmaðurinn í boltanum og er duglegur að rífa kjaft, en hann er einnig umboðsmaður Zlatan Ibrahimovic og Paul Pogba.

„Mér gekk ekki vel til að byrja með þegar ég kom til Everton og hann var sá eini sem sagði mér sannleikann,“ segir Lukaku í viðtali við Daily Express.

„Hann sagði ljóta hluti við mig eins og ég væri að spila eins og stelpa sem hefði aldrei spilað fótbolta.“

„Síðan tók hann leikmenn eins og Zlatan og Bergkamp sem dæmi. Hann spurði mig hvort ég vildi komast á toppinn því ég væri svo sannarlega ekki að spila eins og leikmaður sem vildi ná hæstu hæðum,“ segir Lukaku.

Lukaku hefur heldur betur fundið fjöl sína hjá Everton en hann var búinn að skora í sjö leikjum í röð þar til honum mistókst að skora gegn Newcastle í 1-0 sigri liðsins í gær.

„Raiola sagði hluti við mig sem særðu mig og særðu stolt mitt. Hann sagði mér að að vera framherji snýst bara um að skora mörk. Það sem ég er að gera núna er honum einnig að þakka. Hann náði að hrista til í hausnum á mér þegar ég var langt niðri,“ segir Romelu Lukaku.