Carragher: Van Gaal klikkaði gegn Arsenal en United getur unnið deildina

Manchester United komst aftur á sigurbraut í ensku úrvalsdeildinni um helgina eftir slæmt tap gegn Arsenal fyrir landsleikjafríið.

United heimsótti Everton í Guttagarð og vann 3-0. Þetta var aðeins annar sigur United gegn Everton á útivelli síðan 2007 og hann var nokkuð sannfærandi.

Sjá einnig:Herrera frábær í langþráðum sigri United á Goodison Park | Sjáðu mörkin

Jamie Carragher, fyrrverandi miðvörður Liverpool og enska landsliðsins, var hrifinn af frammistöðu United, þá sérstaklega frammistöðu varnarlínunnar.

„Van Gaal klikkaði algjörlega gegn Arsenal þar sem Ashley Young og Daley Blind voru í vörninni. Þó þeir séu góðir leikmenn eru þeir ekki náttúrlegir varnarmenn. Ef þeir hefðu spilað gegn Everton hefði Romelu Lukaku borðað þá í morgunmat,“ segir Carragher í pistli á vefsíðu Daily Mail.

„Van Gaal áttaði sig á mistökum sínum og stillti upp Chris Smalling og Phil Jones. Þeir elskuðu þessa baráttu. Svo var hann með Darmian og Rojo þannig Van Gaal stillti upp alvöru varnarlínu,“ segir Carragher sem hefur trú á United-liðinu á þessari leiktíð.

„United er búið að eyða fullt af peningum og er með frábæra leikmenn. Það getur svo sannarlega unnið deildina. Nú á United borgarslaginn gegn City fyrir höndum og getur byggt leik sinn þar í kringum sterka vörn,“ segir Jamie Carragher.