Meirihluti Íra vill afglæpavæða fóstureyðingar í landinu

Meirihluti Íra vill að írsk stjórnvöld endurbæti fóstureyðingarlöggjöf í landinu, sem er ein sú harðasta í heimi. Í niðurstöðum nýlegrar skoðunarkönnunar á vegum Amnesty International kom í ljós að meirihluta landsmanna er ekki kunnugt um að fóstureyðing sé glæpur í landinu.

Þá leiddi könnunin jafnframt í ljós að yfirgnæfandi meirihluti aðspurðra er andsnúinn refsiákvæðum í lögum gegn konum sem fara í fóstureyðingu eða gegn læknum sem framkvæma slíkar aðgerðir.

Alls voru 67 prósent aðspurðra fylgjandi afglæpavæðingu fóstureyðinga og 25 prósent andsnúinn. Þá voru 81 prósent aðspurðra fylgjandi löglegri fóstureyðingu í einhverjum tilvikum. Jafnframt voru 70 prósent aðspurðra sammála um að réttur kvenna til að gangast undir fóstureyðingu heyrði til mannréttinda, þegar þungun er afleiðing nauðgunar eða sifjaspells, þegar líf eða heilsa konu eða stúlku er í hættu eða þegar um alvarlega eða lífshættulega fósturgalla ræðir.

Í júní síðastliðnum áréttaði nefnd á vegum Sameinuðu þjóðanna að réttur kvenna til fóstureyðingar væri mannréttindi og skoraði á írsk stjórnvöld að breyta fóstureyðingarlöggjöfinni í samræmi við alþjóðleg mannréttindaviðmið.

„Ljóst er að viðhorf almennings á Írlandi til fóstureyðinga hefur tekið miklum breytingum. Fólk sýnir þeim aðstæðum sem konur finna sig í meiri skilning og trúir því staðfestlega að ekki eigi að refsa konum sem leita sér fóstureyðingar,“ segir Colm O‘ Gorman, framkvæmdastjóri Amnesty International á Írlandi, í tilkynningu frá samtökunum

„Afglæpavæðing fóstureyðinga er ekki eingöngu mannréttindamál – það er vilji almennings á Írlandi að afglæpavæðing fóstureyðinga nái fram að ganga. Það þýðir að afnema verður breytingarlög á írsku stjórnarskránni um bann við fóstureyðingum sem tóku gildi árið 1983,“ bætir hann við.

Alls tóku þúsund írskir ríkisborgarar þátt í skoðunarkönnuninni dagana 11. til 14. maí 2015. Stærð þýðsins réðst af aldri, kyni og félagslegri og efnahagslegri stöðu.