Ritstjórnarskrifstofur SVT rýmdar

Búið er að rýma ritstjórnarskrifstofur sænska ríkisútvarpsins, SVT, í Blekinge eftir að umslag með hvítu dufti barst þangað í morgun. Unnið er að greiningu þess en þangað til verður starfsmanninum, sem barst bréfið, haldið í einangrun inni í fundarherbergi sjónvarpsins. 

Aftonbladet segir frá því að sjónvarpinu hafi að undanförnu borist margar hótanir, símleiðis og í gegnum tölvupóst, vegna umfjöllunar um þjóðernissinnuðu hljómsveitina Ultima Thule, sem spilaði á samkomu sem skipulögð var af Jimmie Åkesson, formanns Svíþjóðardemókrata.