Hætt komin þegar hnúfubakur stökk á bát þeirra

Tveir breskir kajakræðarar voru hætt komnir þegar stór hnúfubakur stökk skyndilega upp úr sjónum undan ströndum Kaliforníu og lenti á báti þeirra. Ræðararnir sluppu með skrekkinn en báturinn er töluvert skemmdur.

„Þetta var eins og að lenda í snjóflóði, eða að fá ofan á sig rútu,“ sagði Charlotte Kinloch, annar ræðaranna í samtali við Telegraph. Unnusti hennar sem var með henni, Tom Mustill, segist enn varla skilja hvers vegna þau séu á lífi.

„Ég man að þegar ég var kominn á land hugsaði ég, hvernig getur það verið að ég sé á lífi? Kannski er ég mikið slasaður en í áfalli og finn ekki fyrir því. Svo sá ég Charlotte og hugsaði, af hverju er hún ekki dáin?,“ segir hann.

Hópur fólks á hvalaskoðunarbáti varð vitni að atvikinu, og fór heldur betur um þau, líkt og sést á myndbandinu hér fyrir neðan.