Biðin eftir nýjum stjóra ekki að trufla Gylfa og félaga

Jack Cork, liðsfélagi Gylfa Þórs Sigurðssonar hjá Swansea City, segir að það trufli ekki leikmenn liðsins að velska félagið sé ekki enn búið að finna eftirmann Garry Monk.

Swansea hefur ekki verið með fastráðinn knattspyrnustjóra í síðustu fjórum leikjum eða síðan að Garry Monk var rekinn 9. desember síðastliðinn.

Swansea er enn að leita að nýjum knattspyrnustjóra en Alan Curtis hefur stýrt liðinu í þessum fjórum leikjum.

„Við erum að spila fyrir hvern annan og fyrir liðið. Við erum búnir að endurheimta baráttuandann. Það sést bara á úrslitunum að þessi stjórastaða liðsins er ekki að hafa áhrif á okkur," sagði Jack Cork.

Jack Cork er miðjumaður og í samkeppni um sæti við íslenska landsliðsmanninn Gylfa Þór Sigurðsson en spilaði þó vanalega mun aftar á miðjunni heldur en Gylfi.

„Curt og Dave eru búnir að standa sig vel. Ég er viss um að þeir kæmust mjög vel frá því að klára tímabilið með liðið," sagði Cork.

„Við höfum bara bitið á jaxlinn og haldið áfram. Það er enginn í fýlu eða að svekkja sig. Við vitum það vel að menn ganga í gegnum svona hluti í fótboltanum," sagði Cork.

„Við höfum spilað vel á tímabilinu en við höfum líka spilað illa. Við höfum náð góðum úrslitum að undanförnu og vonandi getum við komist á gott skrið í framhaldinu," sagði Cork.

Swansea datt niður í fallsæti eftir að hafa náð aðeins einu stigi út úr sex leikjum frá lok október fram í miðjan desember. Liðið hefur náð í fimm stig út úr síðustu þremur leikjum og situr nú í fjórða neðsta sæti deildarinnar.

Jack Cork kom inn í byrjunarliðið fyrir jafnteflisleikinn á móti Crystal Palace en Gylfi Þór Sigurðsson var einn af átta leikmönnum sem misstu sætið sitt í byrjunarliðinu.