Gleymi ekki orðum Van Gaal

Erik Pieters, bakvörður Stoke, hefur greint frá því að Louis van Gaal hvatti hann til þess á sínum tíma að ganga ekki til liðs við Stoke City.

Þetta var árið 2013 og Van Gaal var þjálfari hollenska landsliðsins. Hann er í dag stjóri Manchester United sem fer í heimsókn á Brittania-leikvanginn á annan dag jóla.

„Ég man hvað hann sagði,“ sagði Pieters í samtali við Stoke Sentinel. „Í upphafi hvers tímabils telur fólk að Stoke muni falla. Það gerðist á fyrsta árinu mínu hér, öðru og þriðja.“

„En á fyrsta tímabilinu mínu vorum við í efri hluta deildarinnar og lékum það eftir ári síðar. Vonandi getum við haldið því áfram og náð þeim árangri þriðja árið í röð.“

„Ég er ánægður með ákvörðunina sem ég tók og er fullviss um að þetta var rétt skref fyrir mig. Mér líður vel, hefur ekki lðið betur í mörg ár og þetta tímabil er það besta sem ég hef spilað á ferlinum.“

United hefur tapað tveimur deildarleikjum í röð og ekki unnið í síðustu fjórum. Það er í fimmta sæti deildarinnar en Stoke í því ellefta. Liðið hefur aðeins unnið einn af síðustu fjórum deildarleikjum sínum.