Mikilvægur sigur Liverpool á toppliðinu | Sjáðu markið

Liverpool vann mjög mikilvægan sigur á toppliði Leicester í ensku úvralsdeildinni í dag. Varamaðurinn Christian Benteke gerði eina mark leiksins.

Heimamenn í Liverpool voru sterkari aðilinn í fyrri hálfleik. Divock Origi sem hafði verið sprækur í fyrri hálfleik meiddist og þurfti að fara af velli og í hans stað kom Christian Benteke.

Það var einmitt Benteke sem gerði eina mark leiksins, en það kom á 63. mínútu. Þá fékk hann sendingu frá Roberto Firmino og lagði boltann í netið.

Tveir af heitustu leikmönnum ensku úrvalsdeildarinnar þeir Riyad Mahrez og Jamie Vardy náðu sér ekki á strik og var þeim báðum skipt af velli í síðari hálfleik.

Liverpool er eftir sigurinn í áttunda sæti deildarinnar með 27 stig, en Leicester er á toppnum með 38 stig. Arsenal getur þó skotist á toppinn með sigri á Southampton í kvöld.