Cleverley tryggði Everton sigur nokkrum sekúndum fyrir leikslok | Sjáðu markið

Tom Cleverley reyndist hetja Everton þegar hann skoraði sigurmark liðsins á ögurstundu gegn Newcastle í síðdegisleik dagsins í ensku úrvalsdeildinni, en heil umferð fór fram í dag.

Everton sótti án afláts og voru mikið sterkari aðilinn í fyrri hálfleik. Þeir fengu nokkur hálffæri, en gekk illa að skapa sér afgerandi marktækifæri og staðan markalaus í hálfleik.

Í síðari hálfleik bættu gestirnir enn meira í sóknarleikinn og fengu heimamenn í Newcastle nokkur fín skyndiáhlaup, en fóru illa að ráði sínu og virtist leikurinn vera að renna út í sandinn.

Það var á þriðju mínútu uppbótartíma sem sigurmarkið kom. Leighton Baines tók þá hornspyrnu sem Rob Elliot, markvörður Newcastle, sló út í teiginn. Þar var Tom Cleverley og skallaði hann boltann yfir þá leikmenn sem voru fyrir framan hann og í netið. Fyrsta mark Cleverley í búningi Everton.

Leikmenn Newcastle tóku miðju og svo flautaði slakur dómari leiksins, lee Mason, til leiksloka. Ótrúlegar lokasekúndur og dýrmæt stig fyrir Everton sem fara upp í níunda sætið með sigrinum; einu á eftir grönnum sínum í Liverpool. Newcastle er í átjánda sæti með sautján stig.