Bild og Kicker: Guardiola tekur við City

Þýsku blöðin Bild og Kicker greina bæði frá því á vefsíðum sínum síðdegis að Pep Guardiola muni í sumar taka við stöðu knattspyrnustjóra hjá Manchester City.

Báðir miðlar hafa þetta eftir sínum heimildum og fullyrða að Guardiola haldi til Englands í sumar þrátt fyrir að Manuel Pellegrini, núverandi stjóri City, sé samningsbundinn félaginu til 2017.

Hjá Manchester City starfa tveir fyrrum samstarfsfélagar Guardiola frá því að hann var hjá Barcelona. Það eru Ferran Sorriano, framkvæmdastjóri, og Txiki Begiristain, yfirmaður íþróttamála.

Á dögunum greindi Guardiola frá því að hann myndi ekki vera áfram hjá Bayern München þegar samningur hans rennur út við félagið í sumar. Hann hefur verið sterklega orðaður við lið á Englandi - allra helst bæði Manchester-liðin og Chelsea.