Hiddink: Var með Holland í bílstjórasætinu í undankeppni EM

Guus Hiddink stýrir Chelsea í fyrsta sinn eftir endurkomuna á laugardaginn þegar liðið tekur á móti sjóðheitum nýliðum Watford á Stamford Bridge.

Hollendingurinn var ráðinn sem bráðabirgðastjóri Chelsea öðru sinni eftir að José Mourinho var rekinn frá Chelsea öðru sinni á dögunum.

Hiddink sat sinn fyrsta blaðamannafund í dag og var spurður hvort stuðningsmenn Chelsea ættu að hafa áhyggjur af gengi hans með síðustu tveimur liðum sem hann stýrði; Rússland og Holland.

Hiddink gekk illa með rússneska landsliðið og var svo rekinn frá störfum hjá því hollenska, meðal annars eftir tap gegn Íslandi á Laugardalsvellinum.

„Holland stóð sig vel á HM þannig fólk var í smá þynnku eftir það og gerði óraunhæfar væntingar til liðsins,“ sagði Hiddink.

„Því miður fékk ég ekki að klára það verkefni því framkvæmdastjórinn rak mig þegar undankeppnin var hálfnuð. Við vorum í þriðja sæti.“

„Ef ég á að vera heiðarlegur þá var ég mjög svekktur með þá ákvörðun því við vorum í bílstjórasætinu í undankeppninni þegar þrír til fjórir leikir voru eftir. Við gátum alveg klárað þetta og komist á EM,“ sagði Guus Hiddink.