Hiddink vill fá Drogba aftur til Chelsea

Didier Drogba gæti verið á leið aftur til Chelsea, ekki sem leikmaður heldur sem hluti af þjálfaraliðinu. Guus Hiddink, sem var á dögunum ráðinn knattspyrnustjóri Chelsea út tímabilið, hefur staðfest þetta.

Drogba sat með Hiddink og Roman Abramovich, eiganda Chelsea, þegar ensku meistararnir unnu Sunderland, 3-1, á laugardaginn en það var fyrsti leikur liðsins eftir að José Mourinho var sagt upp störfum.

Sjá einnig: Hiddink: Var með Holland í bílstjórasætinu í undankeppni EM

Chelsea ætlar að reyna fá Drogba til liðsins sem fyrst en hann er samningsbundinn Montreal Impact, sem leikur í MLS-deildinni í Bandaríkjunum, út næsta tímabil. Fílabeinsstrendingurinn hefur gert góða hluti með Montreal en hann skoraði 12 mörk í 14 leikjum á síðasta tímabili.

Hiddink hefur mikið álit á Drogba og vill ólmur fá hann til Chelsea á ný en framherjinn sterki skoraði á sínum tíma 164 mörk í 381 leik fyrir félagið.

"Ég þjálfaði hann fyrir 5-6 árum og það var mjög gott að vinna með atvinnumanni eins og honum," sagði Hiddink sem stýrði Chelsea einnig seinni hluta tímabilsins 2008-09.

Chelsea tekur á móti Watford á öðrum degi jóla í fyrsta leik meistaranna undir stjórn Hiddink.