Rooney segir leikmennina standa með Van Gaal

Wayne Rooney, fyrirliði Manchester United, hefur komið knattspyrnustjóra liðsins, Louis Van Gaal, til varnar eftir slakt gengi liðsins undanfarnar vikur.

Mikið hefur verið rætt um framtíð hollenska knattspyrnustjórans undanfarnar vikur en Manchester United hefur tapað þremur leikjum í röð og hefur ekki unnið leik í rúmlega mánuð.

Á miðvikudaginn neitaði Van Gaal að svara spurningum blaðamanna og gekk út af blaðamannafundi en enskir fjölmiðlar hafa greint frá því undanfarna daga að staða hans sé í hættu.

Rooney gerði aftur á móti lítið úr slíkum fullyrðingum og sagði leikmennina standa með Van Gaal.

„Maður les um hluti sem eiga að vera að gerast en þeir sem eru að skrifa þetta vita ekki hvað er að gerast. Það er ekkert til í þessum sögusögnum. Við munum halda áfram að berjast fyrir þjálfarann og vonandi getum við snúið við gengi liðsins.“