Hughes: Hugarfarið er ekki í lagi hjá leikmönnum Manchester United

Fyrrum leikmaður Manchester United og núverandi knattspyrnustjóri Stoke City, Mark Hughes, skaut á fyrrum lið sitt fyrir leik liðanna í ensku úrvalsdeildinni í dag en hann segir að leikmenn liðsins séu andlausir og skorti leiðtogahæfileika.

Mikið hefur verið rætt um framtíð Louis Van Gaal, knattspyrnustjóra liðsins, undanfarnar vikur en Manchester United hefur tapað þremur leikjum í röð og ekki unnið leik frá 21. nóvember.

Fyrrum leikmenn liðsins, þar á meðal leikmenn á borð við Rio Ferdinand og Paul Scholes, hafa verið duglegir að gagnrýna leikmenn liðsins og tók Hughes undir orð þeirra.

„Ég veit ekki hvernig þetta er á þessu tímabili en það var alltaf gerð krafa til þess að vinna alla leiki. Við vonuðumst ekki eftir sigri, við bjuggumst við sigri í öllum leikjum þegar ég var leikmaður félagsins. Nýju leikmenn félagsins eru ekki með þetta hugarfar,“ sagði Hughes og bætti við:

„Áhorfendurnir kröfðust þess að sjá sóknarsinnaðan bolta og það er enn búist við því af leikmönnum félagsins.“