Arsenal á toppinn og Cech bætti met | Sjáðu mörkin

Petr Cech skráði nafn sitt í sögubækurnar í kvöld er hann hélt hreinu í 170. leik sínum í ensku úrvalsdeildinni. Arsenal vann þá 2-0 sigur á Bournemouth.

Þar með bætti hann met David James sem hélt markinu hreinu í 169 skipti í 572 deildarleikjum. Cech þurfti ekki nema 351 leik til að bæta met hans.

Cech var sem kunnugt er á mála hjá Chelsea í ellefu ár áður en hann skipti yfir í Arsenal í sumar. Síðan þá hefur hann spilað níu leiki í Arsenal-treyjunni án þess að fá á sig mark.

Sigurinn í kvöld var kærkominn hjá Arsenal sem steinlá fyrir Southampton, 4-0, um helgina en Arsene Wenger, stjóri liðsins, gerði fjórar breytingar á liði sínu fyrir leikinn.

Gabriel Paulista kom Arsenal yfir með skallamarki eftir hornspyrnu Mesut Özil á 27. mínútu áður. Í síðari hálfleik skoraði Özil sjálfur glæsilegt mark eftir frábært þríhyrningsspil við Olivier Giroud.

Arsenal fékk tækifæri til að bæta við mörkum eftir þetta en varð að láta sér 2-0 sigur nægja.

Mörkin má sjá hér fyrir neðan en með sigrinum í kvöld komst Arsenal á topp ensku úrvalsdeildarinnar. Liðið er með 39 stig, einu meira en Leicester sem á leik til góða.

Bournemouth er í sextánda sætinu með 20 stig, þremur stigum frá fallsæti.

Gabriel Paulista kom Arsenal yfir á 27. mínútu: Mesut Özil skoraði annað mark Arsenal á 63. mínútu eftir frábært samspil við Olivier Giroud: