Jóhann Berg ekki með og enn eitt tapið hjá Charlton

Jóhann Berg Guðmundsson var ekki í leikmannahópi Charlton í dag vegna meiðsla er liðið tapaði fyrir Wolves, 2-0, í ensku B-deildinni í dag.

Jordan Graham kom Wolves yfir með sínu fyrsta aðalliðssmarki á ferlinum en Harry Lennon varð svo fyrir því óláni að skora sjálfsmark skömmu fyrir leikslok.

Björn Bergmann Sigurðarson var á meðal varamanna Wolves í dag en kom ekki við sögu í leiknum.

Þetta var þrettánda tap Charlton í deildinni en liðið er næstneðst með nítján stig. Síðasti sigur liðsins kom gegn Birmingham fyrir rúmum mánuði síðan.