Loksins sigur hjá West Ham

West Ham er aftur komið á sigurbraut í ensku úrvalsdeildinni eftir langa bið en liðið vann Southampton á heimavelli, 2-1.

West Ham vann síðast sigur í deildinni þann 24. október en liðið byrjaði tímabilið af miklum krafti.

Liðið hefur þó aðeins tapað fjórum leikjum allt tímabilið en fyrir leikinn í kvöld hafði það gert fimm jafntefli í röð.

Southampton, sem vann Arsenal 4-0 um helgina, byrjaði betur og komst yfir þegar skot Dusan Tadic fór inn eftir að hafa breytt um stefnu á Carl Jenkinson.

Jöfnunarmarkið var skrautlegt en Michail Antonio gerði það er tilraun til markhreinsunar fór af honum og í markið.

Andy Carroll var svo hetjan er hann skoraði með skalla af stuttu færi, skömmu eftir að hafa brennt af dauðafæri.

West Ham er komið upp í sjöunda sæti deildarinnar eftir sigurinn í kvöld en Southampton er í tólfta sætinu með 24 stig.